بەڕێز نزار محەمەد سەعید ئامێدی
سەرۆکی کۆماری عێراقی فیدراڵی
ئێمە وەک کۆنگرەی نەتەوەیی کوردستان پێشوازی لە هەڵبژاردنی بەڕێزتان وەک سەرۆک کۆماری عێراق داکەین و بە گەرمیی پیرۆزباییتان لێدەکەین.
هیوادارین ئەم هەڵبژاردنە ببێتە دەرفەتێک بۆ سەقامگیریی و ئاوەدانی و دیموکراسی لە عێراقدا. گەلەکەمان بەهیوایە لەم خولەی سەرکۆماریی بەرڕێتاندا مافە دەستوریەکانی بە کردەوە بسەلمێنرێت و هەموو کێشەکانی نێوان هەرێم و بەغدا لەسەر بنەمای دەستووری عێراق چارەسەر بکرێن. لە ناویشیاندا مادەی 140. جگە لەوەش خواست و مافە ڕەواکانی هەموو پێکهاتەکانی عێراق بە ئاشووری- کلدانی-سوریانی و تورکمان و هەموو ئایین و مەزهەبەکانی عێراقەوە بپپارێزرێن و دەستەبەر بکرێن. باوەڕدارانی ئێزیدی، بەتایبەتی خەڵکی شەنگال، ئازارێکی زۆریان چەشتووە و بریندارن، دەبێت بە ئیمان و کولتوور و ناسنامەی خۆیانەوە بپارێزرێن.
جەنابی سەرۆک، ئێوە دەمێکە لە بزووتنەوەی ئازادیی کوردستاندا بەشدارن و ئەزمونتان هەیە. ناوچەی ڕۆژهەڵاتی ناوەڕاست بە عێراق و کوردستانیشەوە لە قەیرانێکی گەورەدایە. چارەسەرنەکردنی پرسی کورد نائارامیی و ناسەقامگیریی لە سەرتاسەری ناوچەکەدا دروست دەکات. تا پرسی کورد بە شێوەیەکی دیموکراسی و دادپەروەرانە چارەسەر نەکرێت، ئاشتی و سەقامگیریی لە ڕۆژهەڵاتی ناوەڕاستدا دەستەبەر نابێت. هیوادارین هەمیشە ئەم ڕاستییە لەبەرچاو بگرن و هەڵوێست و کردارێکتان هەبێت بۆ ئەوەی پرسی کورد بە شێوەیەکی ئاشتیانە لە سەرتاسەری ناوجەکەدا چارەسەر بکرێت.
سڵاو و ڕێز
کۆنسەی بەڕێوەبەریی کۆنگرەی نەتەوەیی کوردستان – کەنەکە
2026.04.11 برۆکسل
