پەیامێک لە ژنانی کوردەوە بۆ ڕژێمی ئێران: هەڕەشە و گوشار ناتوانن ژنانی کورد ڕابگرن

لەم چەند ڕۆژەی ڕابردوودا، هەڕەشە و هێرشەکانی ڕژێمی ئێران بۆ سەر گەلی کورد زیاتر بوون. هاوکات، ئیعدامکردنی گەنجانی گەلەکەمان و ئەندامانی ئۆپۆزیسیۆنی ئێرانی ڕووی لە زیادبوون کردووە و ستەمکاری بەرامبەر بە ژنانیش بەردەوامە.
ئێمە دەزانین کە ڕژێمی ئێران زۆر لە ڕاپەڕینە ناوخۆییەکان دەترسێت. ئەزموونی بزووتنەوەی «ژن، ژیان، ئازادی» هێشتا لە یادەوەریی خەڵکدا زیندووە.
هەر بەم هۆیەشەوە، حوکمی ئیعدام بۆ جاری دووەم بەسەر وریشە مرادیدا سەپێنراوە. ڕژێمی ئێران لە توانای ژنانی کورد بۆ ڕێکخستن و سەفەربەرکردنی کۆمەڵگە دەترسێت. مامەڵەی تۆڵەسێنانە لەگەڵ زەینەب جەلالیان، ئەو ژنە کوردەی ١٨ ساڵە لە زینداندایە، و سەپاندنەوەی حوکمی ئێعدام بەسەر وریشە مرادیدا، کردەوەی هەڕەمەکی نین.
ڕژێمی ئێران لە تشرینی دووەمی ٢٠٢٤دا حوکمی ئێعدامی بەسەر وریشە مرادیدا سەپاند. ئەم حوکمە لە ساڵی 2025دا لەلایەن دادگاوە هەڵوەشێندرایەوە، بەڵام لە 14ی تشرینی یەکەمی 2026دا دادگا ڕایگەیاند کە جارێکی دیکە بە ئیعدام مەحکوم کراوەتەوە.
پەیامی ڕژێمی ئێران لەم کردەوانەدا ڕوونە: سیاسەتێکی دژەژن پەیڕەو دەکات و بە تایبەتی ژنانی کورد دەکاتە ئامانج.
بەڵام ئەم هەڕەشانە ناتوانن ئیرادەی ژنانی کورد بشکێنن. ژنانی کورد لە ڕۆژاوای کوردستان، لە خەبات دژی داعشدا، ئەمەیان سەلماندووە. لە باکووری کوردستانیش، لە ماوەی چل ساڵی ڕابردوودا لە بەرامبەر سوپای تورکیا، هەمان ئیرادەیان نیشان داوە. هەروەها لە عێراق، لە خەبات دژی ڕژێمی سەدامدا، سەلماندوویانە کە بە هەڕەشە و سەرکوت لە خەبات بۆ ئازادی پاشەکشە ناکەن.
ڕژێمی ئێران ناتوانێت بە هەڕەشەکردن و ترساندنی هاووڵاتیانی خۆی، قەیرانی قووڵی دەسەڵاتداری خۆی چارەسەر بکات. ژنان و گەلانی ئێران ئازادییان دەوێت و بۆ گەیشتن بە خواستی ئازادیی، دیموکراسی پێویستیەکی سەرەکییە.
ڕێگای عەقڵانیی چارەسەری کێشەکان ئەوەیە کە ڕژێم لەگەڵ هاووڵاتیانی خۆی، و پێش هەموو شتێک لەگەڵ ژنان، ئاشتی بکات. هەنگاوی یەکەم بە ڕاگرتنی ئێعدامەکان دەست پێدەکات. هەنگاوی دووەم، ئازادکردنی هەموو زیندانییە سیاسییەکان و خۆشکردنی زەمینەیە بۆ گواستنەوەیەکی دیموکراتیک. دەستەبەرکردنی مافی ڕەوای گەلی کورد و هەموو پێکهاتەکانی دیکە بۆ دیاریکردنی چارەنووسی خۆیان، بەشێکی بنەڕەتیی ئەم چارەسەرەیە.
بۆ کۆتاییهێنان بە سیاسەتی شەڕئەنگێزی و هەڕەشەکردن، دەبێت ڕژێمی ئێران دەستبەجێ وریشە مرادی، پەخشان عەزیزی و زەینەب جەلالیان ئازاد بکات.
هەڕەشە و ئیعدام ناتوانن ژنانی کورد لە خەبات بۆ ئازادی ڕابگرن

کۆمیسیۆنی ژنانی کۆنگرەی نەتەوەیی کوردستان (کەنەکە)
2026.10.20