پیرۆزبایی
ئێمە وەك کۆنگرەی نەتەوەیی کوردستان پیرۆزباییەکی گەرم لە خەڵکی کەرکوک، لەیەکێتی نیشتمانی کوردستان و کاک ڕێبوار تەها، پارێزگاری نوێی کەرکوک دەکەین. هیواخوازین ئەم قۆناغە تازەیە، قۆناغی پێکەوە ژیانی ئاشتیانەو یەکتر قەبوڵکردن و هەڵدانەوەی لاپەڕەی نوێی خزمەتکردن بێت بەو شارەی سەت ساڵە هەوڵدەدرێت دیمۆگرافیاکەی بگۆڕدرێت و بە پیلانی جۆراوجۆری ناوخۆیی و دەرەکی لەشار بخرێت و پەیوەندیە کۆمەڵایەتیەکەی هەڵبوەشێنرێتەوە. هیواداریشین بەڕیز رێبوار تەها وەک پارێزگاری نوێ کە لە زمانی هاوشاریەکانی دەگات، لە ماوەی بەڕێوەبردنی شاردا ئەو برینانە ساڕێژ بکات کە خەڵکی کەرکوک لەئاکامی نادادی و پەرتەوازەیی ساڵانی رابردوودا گیرۆدەی بووبوون. داوا لە هەموو خەڵکی کەرکوک و گەلی کوردستان دەکەین هاوکار و پشتیوانی بن.
کۆنگرەی نەتەوەیی کوردستان بەگرنگی دەزانێت هەموو لایەنە کوردیەکانی ئەو شارە و پێکهاتەکانی دیکەش پێکەوە هاوکار و تەبا بن و ئایندەیەکی باشتر بۆ شارەکەیان دەستە بەر بکەن، ستەمەکانی سەردەمی بەعس بەتەواوەتی لە ڕێی جێبەجێ کردنی قۆناغەکانی بەندی 140ی دەستورەوە بسڕنەوەو شوێنەواری نەهێڵن.
کەرکوک شاری پێکەوە ژیان و پێکەوە هەڵکردنی دیرۆکیە. بەهۆی شوێنگەی ستراتیژی و بوونی سامانی زۆری ژێر زەوی و ئەو شارستانیەتە دێرینەی هەیەتی، هەمیشە وڵاتانی هەرێمی دەستوەردانی تێدا دەکە ن و ناهێڵن خەڵکەکەی بحەسێتەوە، بۆیەگرنگە بەتەبایی و کاری پێکەوەیی بەگژ ئەو دەستوەردانەدا بچنەوە.
دووبارە پیرۆزبای لەهەموو دانیشتوانی کەرکوك دەکەین و بەهیوای داهاتوویەکی گەشتر بۆ بۆ هەمووان.
کۆنسەی بەڕێوەبەریی کۆنگرەی نەتەوەیی کوردستان
2024.08.11 برۆکسل
