بەیاننامەی کۆمسیۆنی مافەکانی مرۆڤ لە کۆنگرەی نەتەوەیی کوردستان – ک ن ک
بڕیاری دادگا دژ بە رۆژنامەنووس ”شێروان شێروانی” و بێڕیزی بەرامبەر پارێزەران و چەند پەڕلەمانتارێکی هەرێمی کوردستان مایەی شەرمەزاری
دوێنی 19 ئاب 2025 لە دادگای تاوانی بنەسڵاوەی شاری هەولێر دادگاییکردنی رۆژنامەنووس ”شێروان شێروانی” بەڕێوەچوو.
دوای دوو کاتژمێر لەدادگاییکردن، بەگوێرەی مادەی 229 لەیاسای ژمارە 111ی سزادانی عێراقی، تاوانبارکراو دواتریش بەچوار ساڵ و پێنج مانگ زیندانیکردن، حوکمدرا.
بە داخەوە، بڕیاری دادگای و هەروەها لێکەوتەو رووداو و هەڵسوکەوتی کارمەندانی ئاسایش لە ناو حەرەمی دادگا دژ بە خودی شێروان شێروانی و پارێزەریی و چەند پەڕلەمانتارێکی هەرێمی کوردستان بووە جێگای نیگەرانی ئێمە لە کۆمسیۆنی مافەکانی مرۆڤی ک ن ک و هەروەها تەواوی خەڵکی کوردستان.
دوا بە دوای خۆپیشاندانی گەنج و جەوانە وڵاتپارێزەکانی دەڤەری شێلادزێ و دێرەلوک دژ بە مۆڵگایەکی سەربازی دەوڵەتی داگیرکەری تورکیا لە شارۆچکەی شێلادزێ، رۆژنامەنووس شێروان شێروانی لە ساڵی 2020 بە تۆمەتی سیاسیی هەڵبەستراو لەگەڵ ژمارەیەکی زۆر لە چالاکوان، مامۆستا و رۆژنامەوانی نیشتمانپەروەری دەڤەری بەهدینان دەستگیر دەکرێن و دادگاکان لەژێر چاودێری و پڕیاری دەسەڵات بە ساڵ و مانگ زیندانیان بۆ دەبڕنەوە. لەژێر فشار و بەدەنگەوەهاتنی خەڵکی ئازادی و مافخوازانی کوردستان و هەروەها دەوڵەتان و رێکخراوەکانی مافی مرۆڤی جیهانی زۆربەیان ئازادکران. ش. شێروانی دوو جار ماوەی حوکمەکەی کۆتایی پێدێت، بەڵام هەر جارەی بە تۆمەتێکی تری هەڵبەستراو حوکمی بە درێژەدان بە زیندان دەدەنەوە. ئەم جارەشیان واتە 19ی ئەم مانگە دیسانەوە بە تۆمەتێک چوار ساڵ و پێنج مانگ حوکم درا.
بەپێی راگەیاندن و روونکردنەوەکانی پارێزەرانی تایبەتی شێروان شەروانی و ئەوانەی کە چاودێری کەیسەکەی دەکەن هەروەها بە ئامادەبوونی رێکخراوی( CPT)، دەستەی سەربەخۆی مافەکانی مرۆڤ، نوێنەرایەتی کۆنسوڵخانەکان، ئاژانسی نێودەوڵەتی و چەند پەرلەمانتارێک چاودێری پڕۆسەی دادگاییکردنەکەیان کرد. بە داخەوە لەبەرچاوی ئەم هەمووانە، بەهۆی ناڕەزایی لە بڕیارەکە لەلایەن چەکداران و ئاسایشی دادگا خودی شێروان شێروانی و چەند پەڕلەمانتارێک دووچاری لێدان و ئیهانەکردن هاتن و بە جەستەیی بریندار کەوتن.
له‌وباره‌یه‌وه تیمی CPT رایگەیاند، چەندین پێشێلکاری زەق و ئاشکرا لەپڕۆسەی بەڕێوەچونی دادگاییەکە هەبوو کە بریتین لە:
１. پارێزەرەکان مافی بینینی تەواوەتی پەڕاوەکانی لێکۆڵینەوە و پێشکەشکردنی پەڕاوو داواکاریان پێنەدرابوو.
２. ناوەوەی دادگا و دەرەوەی باڵەخانەی دادگا، بەسەربازگە کرابوو، هەروەها چەند ئەندامێکی هێزە ئەمنییەکان، بەجلی مەدەنی و بەچەکەوە لەناو هۆڵی دادگاکە بوون.
３. ئەو بەڵگانەی کە دادگا پشتی پێبەستبوو، لەرووی یاساییەوە بەڵگەکان لاواز و دروستکراوبوون.
４. رێگری لە چاودێری کونسوڵخانەکان، رێکخراوەکان، پەڕلەمانتاران و هەروەها خانەوادەی شێروان شێروانی کرا کە چاودێری پرۆسەی دادگاییکردنەکە بکەن.
５. لەدوای تەواوبونی پڕۆسەی دادگاییکردنەکە، بەشێک لەڕۆژنامەوانان، چالاکوانان و خانەوادەی شێروان شێروانی لەبەردەم باڵەخانەی دادگاکە، ناڕەزایەتی مەدەنییان دەربڕی، بەڵام کۆمەڵێک خەڵکی چەکدار، بەجلی مەدەنییەوە هێرشیان کردە سەریان و بەلێدان و ئەشکەنجەدان بڵاوەیان پێکردن.
ئێمە لە کۆمسیۆنی مافەکانی مرۆڤ لە کۆنگرەی نەتەوەیی کوردستان ک ن ک جگە لە نیگەرانی و بە ناحەقزانینی ئەم بڕیارەی دادگاییکردنی شێروان شێروانی و هەڵسوکەوتە عەسکەرتاریەی لەناو حەرەمی دادگایەکی هەرێمی کوردستان مەحکوم دەکەین و بەردەوامبوون لەم جۆرە مامەڵەیە و لادان لە برگە و پرەنسیپەکانی یاسا و عەدالەت و حوکمی نادادپەروەرانە بەرامبەر بە رۆژنامەوانان، چالاکوانانی مافی مرۆڤ، کەش و مەودای ئازادی دەربڕین لە هەرێمی کوردستان بەرتەسک دەکاتەوە و هەڕەشە و گەفیی جیدین بۆ دروستکردنی کۆمەڵگەیەکی دیموکراسی و مرۆڤدۆستی.
ئێمە لە سەرجەم ناوەند و سەکۆکانی پەیوەست بە مافەکانی مرۆڤ و رێکخراوەکانی ناوخۆ و نوێنەرانی رێکخراوەنێودەوڵەتیەکان لە هەرێم داواکارین لە قۆناغی تەمییزدا فشاربخەنە سەر دادگای تەمییز بۆ هەڵوەشاندنەوەی ئەم بڕیارە.
داوا لە پەڕلەمانی هەرێمی کوردستان دەکەین کە هەموو پەروەندەسازی سیاسی دژ بە رۆژنامەنووسان و چالاکوانانی کوردستان و بەتایبەتی کەیسی چالاکوانانی بەهدینان بوەستێنن. ئازادی تەواو بدرێت بە کاری رۆژنامەوانی و ئازادی دەربڕین و کەیسە مەدەنیەکان بە سیاسی و حیزبی و شەخسی نەکرێن و مەحرەم و پیرۆزی دادگاکانی هەرێم لە چەکدار و نوێنەرانی ئەحزابەکان بپارێزرێن و سەربەخۆ و سەروەر بەسەر هەموو هێز و کەسێکەوە بێت.
داواکارین بەبێ قەید و شەرت زیندانیانی سیاسی لە هەرێمی کوردستان بنبڕ بکرێت و ئەم بڕیارەی دادگاییکردنی رۆژنامەوان شێروان شێروانی هەڵبوەشێنرێتەوە و ئازادبکرێت.
کومسیۆنی مافی مرۆڤی کۆنگرەی نەتەوەیی کوردستان – ک ن ک
19 ئاب 2025
