سەبارەت بە رووداوەکانی سلێمانی
بەداخێکی زۆرەوە شەوی رابردوو لە باشووری کوردستان، لە سلێمانی رووداوی نەخوازراو روویاندا و لە ئەنجامدا سەرەڕای ئەوەی قوربانی لێکەوتەوە، بوو بە هۆی نیگەرانی و ترسی خەڵک لە تێکچوونی دۆخەکەو ناسەقامگیریی زیاتر. ئەمە لە کاتێکدایە کە باشووری کوردستان بە قەیرانی قووڵی ناوخۆییدا تێپەڕدەبێت. دوای تێپەڕبوونی زیاتر لە 10 مانگ بەسەر هەڵبژاردندا ، نە پەرلەمان کارا بووە و نە حکومەت پێکهاتووە، کێشەی ئابووری و دۆخی ژیانی خەڵک چارەسەر نەکراوە، کێشەکان لەگەڵ حکومەتی بەغدا بەردەوامن و هەڕەشە و مەترسی لەسەر قەوارەی هەرێمی باشوور و تەواوی کوردستان درێژەی هەیە. رێک لەم کاتەدا لە بری ئەوەی کار بۆ سەروەری یاساو چارەسەکردنی کێشە ناوخۆییەکان بە رێگای دیالۆگ و لێکتێگەیشتن بکرێت، پەنا بۆ توندوتیژی دەبرێت. دۆخێکی ئاوا نەک خزمەت بە دۆزی کوردستان ناکات بە ڵکو ترس و نیگەرانی لای کۆمەڵانی خەڵکی کوردستان درووست دەکات و زیاتر قەوارەی هەرێم رووبەڕووی مەترسی دەکاتەوە. پاراستن و سەقامگیریی هەرێمیش لە ئەستۆی هەمووماندایە.
ئەو کێشانەی کە وەک کێشەی ناوخۆیی لە کوردستاندا دەردەکەون، مەترسیی گەورەیان لە هەناوی خۆیاندا هەڵگرتووە. لەبەرئەوەی ئێستا کوردستان بە قۆناغێكی هەستیار و گرنگی رۆژهەڵاتی ناوەڕاستدا تێپەڕدەبێت،گرنگی ستراتیژیی کوردستانێش لە ڕۆژهەڵاتی ناوەڕاست ڕۆژ لە دوای ڕۆژ زیاتر دەبێت. لە ئەنجامدا هەم ئەو دەرفەتە مێژووییە و هەم مەترسییە جدییەکانیش کە لە پێشمانن، بە هەمان شێوە زیاتر دەبن. پێویستە ئاماژە بەوە بکرێت کە زۆرێک لەو هێزانەی دژایەتی گەلەکەمان دەکەن، بەدوای دەرفەتدا دەگەڕێن بۆ ئەوەی کێشەکانمان گەورەتر و قووڵتر بکەن.
ئێمە لە کۆنگرەی نەتەوەیی کوردستان سەرەخۆشیی لە کەسوکاری قوربایان دەکەین هیوای زوو چاکبوونەوە بۆبرینداران دەخوازین. داواکارین بە زووترین کات کێشەکانی ناوچەی سلێمانی چارەسەربکرێن و رووداوگەلی لەو شێوەیە بە دیالۆگ وشێوازی مەدەنیانە بە رێکاری یاسایی و لە دادگای بێلایەندا چارەسەربکرێن. پێویستە هێزو لایەنەکانی باشووری کوردستان، رێکخراوەکانی کۆمەڵگەیی مەدەنی و رؤشنبیر و رۆژنامەوان و تەواوی گەلی باشووری کوردستان، لەوە دڵنیابکرێنەوە کە لە کەشێکی ئازاد و دیموکرات و سەقامگیردا دەتوانن درێژە بە کارەکانیان بدەن.
کۆنسەی بەڕیوەبەریی کۆنگرەی نەتەوەیی کوردستان
25.08.23 برۆکسل
