داواکاری بەپەلە بۆ ئۆفیسی نەتەوە یەکگرتووەکان بۆ کارووباری ژنان: ڕاگرتنی سزای لەسێدانی شەریفە محەممەدی و هەڵپساردنی سزای لەسێدارەدان لە ئێران
ئێمە بە ڕێزەوە داوا لە نەتەوە یەکگرتووەکان و ئۆفیسی ژنانی نەتەوە یەکگرتووەکان (UN Women) دەکەین تاکو فشار بۆ کۆماری ئیسلامیی ئێران بێنن کە دەستبەجێ قەدەخەیەک لەسەر هەموو جێبەجێکردنەکانی سزای لەسێدارەدان دابنێت و شەریفە محەممەدی، پارێزەری مافەکانی مرۆڤ و هەموو زیندانییە سیاسییەکانی تر ئازاد بکات.
لەم ڕۆژانەی دواییدا، دیوانی باڵای ئێران بریاری سزای لەسێدارەدانی شەریفە محەممەدی پشتڕاستکردەوە. ئەم بڕیارە لە دوای دەستبەسەر کردنی ناوبراو بە تۆمەتی ساختە، لە پڕۆسەیەکی دوور لە عەداڵەت و لە ژێر گوشار و ئەشکەنجە و دانپێدانانی زۆرەملی، دەرکراوە. هەڵسووکەوتی کاربەدەستانی کۆماری ئیسلامی دەرخەری شێوەیەکی بەربڵاوی ژێر پێ خستنی سیستەماتیکی مافەکانی مرۆڤ، لەوانەش سەرکوتکردنی ژنان و سنووردار کردنی ئازادی ژنانە.
لە دوای شۆڕشی ژن، ژیان، ئازادی، حکوومەتی ئێران هەوڵێکی زۆری داوە کە بە دەستبەسەر کردن، زیندانی کردن و لە سێدارەدان، ژنان لە ژیانی گشتیی بێبەش بکات و دەنگی ژنان کپ بکات. ئێمە زۆر نیگەرانین، کە لەگەڵ خانم محەممەدی، دوو ژنی چالاکی کورد، چالاکوان وریشە مورادی و چالاکی مافی ژنان پەخشان عەزیزی کە ناڕەوا تۆمەتی «سەرهەڵدانی چەکداری دژ بە دەوڵەت» دراوەتە پاڵیان، حوکمی ئێعدامیان بە سەردا بسەپێندرێت.
ئێمە، کۆمیسیۆنی ژنانی کۆنگرەی نەتەوەیی کوردستان (KNK)، سزای لەسێدارەدانی سەپێندراو بە سەر شەریفە محەممەدی بە توندترین شێوە شەرمەزار دەکەین. ئێمە داوا لە کۆماری ئیسلامیی ئێران دەکەین کە بەکارهێنانی سزای سێدارە ڕابگرێت و خانم محەممەدی و هەموو چالاکوانە مەدەنی و سیاسییەکانی تر کە زیندانی کراون، ئازاد بکات.
ئێمە دژی تیرۆری دەوڵەتی و کوشتنین لە ژێر هەرناوێکدا بێت و داوا دەکەین لە نەتەوە یەکگرتووەکان، هەموو کاربەدەستانی کۆمەڵگەی نێونەتەوەیی و چالاکوانانی مافی مرۆڤ کە بە تەواوی هێزی خۆیان تێبکۆشن بۆ ڕزگارکردنی گیانی شەریفە محەممەدی و دەستەبەر کردنی ئازادی هەموو زیندانیانی سیاسی لە ئێران.
ژیانی ئازاد، مافی هەموو کەسێکە لە کۆمەڵگادا.
کۆنگرەی نەتەوەیی کوردستان – کۆمیسیۆنی ژنان
