کۆنفرانسی ڕۆژهەڵات کە ڕۆژانی ٢٦ و ٢٧ی ئاڤریلی ٢٠٢٥ لە وڵاتی هۆڵەندا بەڕێوە چوو، کەوتە ژێر کاریگەریی دوو ڕووداوی «کۆنفرانسی یەکڕیزی و یەکهەڵوێستیی ڕۆژئاوا» و «تەقینەوەی کارەساتباری بەندەرعەباس»ـەوە و ئەمەش وای کرد کەمتر ئاوڕی لێ بدرێتەوە. بەشداربوانی کۆنفرانس وێڕای ڕاگەیاندنی پاڵپشتیی خۆیان و هیوای سەرکەوتن بۆ کۆنفرانسی ڕۆژئاوا و هەروەها خەبات و پرۆسەی ئاشتی لە باکووری کوردستان، هاوکات سەرەخۆشی لە بنەماڵەی قوربانیانی مەدەنیی ڕووداوەکەی بەندەرعەباس دەکەن و حکومەتی ئێران بە بەرپرسیاری ئەم کارەساتە دەزانن .

…

ئەگەرچی بڕیاری گرێدانی ئەم کۆنفرانسە دەگەڕێتەوە بۆ کۆنفرانسی سەدساڵەی پەیمانی لۆزان، بەڵام دوای ئەو بڕیارە و بەتایبەت لە شەش مانگی ڕابردوودا شەپۆلێکی گەورەی گۆڕانکاری هەرهەموو ناوچەی ڕۆژهەڵاتی ناوەڕاست و لەوانەش کوردستانی گرتووەتەوە.  شەڕی  ٧ی ئۆکتۆبە ر  ئەگە ر  خاڵی وەرچەرخان  نەبووبێت بێگومان  کاتالیزۆرێک  بو وە  بۆ زنجیرەگۆڕانکارییەکی مەزن کە هێشتا هەر بەردەوامە و ڕەنگە تا ساڵانی داهاتوویش درێژە پەیدا بکات. ئەگەرچی هێشتا زۆر بابەت بە ناڕوونی ماوەتەوە و ئەگەری هەرجۆرە پێشهاتێکی تەبا یان دژواز لەگەڵ لۆژیکی ئاشکرای ڕووداوەکان لە ئارادایە، بەڵام  ئاسەوارەکانی ئەم گۆڕانکاریانە تا ئێستا لە دوو پارچەی ڕۆژئاوا و باکووردا خۆیان نیشان داوە. هاوکات مەزەندە دەکرێت دواجار و بەپێی سروشتی هاوکێشە کۆمەڵایەتی، سیاسی، هەرێمی و جیهانییەکان، ڕەوتی گۆڕانکارییەکان بە جۆرێک لە جۆرەکان بەرەو ڕۆژهەڵاتی کوردستانیش هەڵک شێت و دۆخێکی جیاواز و  نوێ بێتە ئاراوە.

بێگومان  بەبێ ئەم هاوکێشە و گۆڕانکاریانەیش،  کۆبوونەوە و گفتوگۆ و ڕاوێژی چالاکان و هێزە سیاسییەکانی کوردستان هەمیشە پێویستییەکی حاشاهەڵنەگر بووە، بەڵام لەم دۆخە نوێیەدا ئاوا زەروورەتێک زۆر زیاتر خۆی نیشان دەدات  .ئەم کۆنفرانسە بەرئەنجامی نیگەرانیی بەشداربوانە لە داهاتووی ڕۆژهەڵاتی کوردستان .

 

ئەزموونە  مێژوو ییەکان  ئەو ڕاستییەمان بۆ دەر دەخەن کە  هەرجۆرە لێکدوو ربوون  و  شپرزەییەکی  ناوخۆیی دەبێتە هۆی لەکیسچوونی دەرفەتەکان،  لە بەرانبەردا یەکگرتوویی و یەکڕیزی دەبێتە گەرەنتییەک بۆ قۆستنەوەی گونجاوت ری دەرفەتەکان و مسۆگەرکردنی زیاترین دەستکەوت  .هاوکاتیش  گەرچی  گفتوگۆ و ڕاوێژی بەردەوام لە خۆیدا  مەرجی پێویستە بۆ ئەنجامداربوونی هەرجۆرە خەبات و تێکۆشانێک، بەڵام بێگومان مەرجی  تێروتەواو  نییە. چونکوو دەشێت وەک زۆربەی هەرەزۆری نموونەکانی ساڵانی ڕابردوو، دانیشتن و گفتوگۆکان تەنها لە ڕواڵەتکاری و نەخشاندنی وێنەیەکی جوانکراودا بمێننەوە و قەت ئاقاری مەبەستداربوون و بەرهەستبوونەوە وەرنەگرن. ئەزموونی ڕاپەڕینی ژن، ژیان، ئازادی نزیکترین ئەزموونێکە پێی سەلماندین کە لە گەرمەی گەورەترین بزووتنەوەی کۆمەڵایەتیی دوای شەستەکانی هەتاویدا، لێکپاتران و لەوەیش گرنگتر، دوژمنکاریی نێوان هێزە سیاسییەکان  دەتوانێت  تا لێواری شەڕی ناوخۆمان ببات  و  ببێتە  هۆکا رێک ب ۆ لەکیسدانی دەرفەتێکی ناوازە و زاڵکردنی جۆ رێک لە کەمهیوایی بەسەر کۆمەڵگادا.

 

هەموو ئەمانە لە کاتێکدایە کە زۆرینەی  خەڵکی ڕۆژهەڵاتی کوردستان لە دۆخێکی ئابووریی زۆر سەخت و لەژێر هێڵی هەژاریدا دەژین. کوردستان سەرچاوەی چەندەها مادەی کانزایی گرنگە، بەڵام نزیک بە هەموویان بە تاڵان دەبرێن و تەنانەت هیچ کارگەیەکیش بۆ گۆڕینیان بە کاڵا لە کوردستاندا دروست نەکراوە، بەم شێوەیە هیچ بەشێک لە داهاتەکەیان ناگەڕێتەوە بۆ کورد خۆی. هەر بۆیە دیاردەی وەک قاچاخ و کۆڵبەری بوونەتە دیاردەیەکی بەرچاو کە بەدەر لە هەموو مەترسییەکانیان بۆ سەر ژیانی خەڵک، هەڵگری گەلێ خەسار و لێکەوتەی کولتووری و کۆمەڵایەتیی زۆر نەگریسیشن و کۆمەڵگا ئالوودەی دژەکولتوورێکی قازانجپەرستانە دەکەن. لەم نێوانەدا دیاردەی کۆڵبەری لەم ساڵانەی ڕابردوو و لەڕووی ڕێژەی کۆڵبەرانەوە پەرەسەندنێکی بەرچاوی بە خۆوە بینیوە و ژمارەیەکی زیاتر لە خەڵک بە ناچار پەنایان بۆ ئەم ناپیشەیە بردووە کە ساڵانە دەبێتە هۆی کوشتن و گیانبەختکردنی دەیان کەسیان. کەرتی کشتوکاڵیش بە هۆی نەبوونی پلانی سیستەماتیک و کەمبوونەوەی ساڵانەی ئاوەوە ڕووی لە کزی کردووە و چیدی وەک جاران ناتوانێت سەرچاوەیەکی قبووڵکراو بۆ داهات و ژیانی وەرزێڕان و باخداران بێت. هەموو ئەمانە لەگەڵ گەندەڵیی سیستەماتیک، ناوەندگەرایی، کۆکردنەوەی مێژوومەندی سەرمایە لە دەستی خودی دەسەڵات و ناوەندنشیناندا و دوو رخستنەوەی لە دەستی خەڵکانی پەراوێزخراوی وەک کورد  ،دۆخەکەی سەدهێندە قەیراناویت ر و سەختتر کردووە .

 

هاوکات ئاستی سەرکوتکاریی حکومەت لە بەرانبەر چالاکوانان و جەماوەری ناڕازیی کوردستاندا بەراورد بە ناوچەکانی دیکەی جوگرافیای ئێران بەردەوام ڕێژەی پێوانەیی تۆمار دەکات و فۆرمە جیاوازەکانی سەرکوت لەسەر ئەو کۆمەڵگایە جێبەجێ دەکرێت. ژنانی کورد کە لە پێشڕەوانی بزووتنەوەی سیاسی-کۆمەڵایەتیی کوردستانن، بەتایبەتی لەدوای سەرهەڵدانی ژن، ژیان، ئازادییەوە کەوتوونەتە بەردەم سەرکوتی زیاترەوە و لە ئێستەدا چەندین ژنی چالاکی کورد لە زینداندا لەژێر سزای لەسێدارەدان یاخود بەندکراندان. سەرباری ئەوەی کەمینە جێندەرییەکانیش لە هەردوو ڕووبەری کۆمەڵایەتی-دەوڵەتیدا ستەمی زەق و توند ئەزموون دەکەن.

 

کەرتی پەروەردە کە بنەمایەکی سەرەکیی حکومەتە بۆ پەرەپێدانی ئایدیۆلۆژیاکەی، پاشڤەچوونێکی بەرچاوت ری بە خۆوە بینیوە و زیاتر بە ناو ڕێڕەوێکی بەئایدیۆلۆژیکک راوی ئیسلامییانەدا ڕۆ چووە. هاوکات بەشی پەروەردەی گشتی کە بەپێی یاساکانی خودی ئێرانیش دەبێ بۆ هەموو هاووڵاتییەک بەخۆڕایی بێت، کزبوونێکی قووڵ دەژی و لە بەرانبەردا پەرە بە قوتابخانە و خوێندنگەی نادەوڵەتی دراوە کە ئەمەیش بەکاڵاکردنی پەروەردەی لێ کەوتووەتەوە. بەم جۆرە بەشێکی بەرچاو لە منداڵانی کوردستان لە خوێندن و پەروەردەی گونجاو و دروست بێبەش  کراون. هەروەها چالاکوانان و ئەنجومەنە پیشەییەکانی مامۆستایانی کوردستان کە کۆڵەکەی  سەرەکیی  تێکۆشانی مامۆستایان لە ئاست هەموو ئێراندا بوون  ،بەردەوام  سەرکوت دەکرێن  و بە سەدان مامۆستای کورد لە کار دەر کراون یان ڕووبەڕووی  دۆسیەسازی  ،دەستبەسەرکردن،  سزادان، بانگهێشتکردن، لێبڕینی مووچە و دوورخستنەوە بوونەتەوە .

 

ژینگەی کوردستان بە بیانووی جۆراوجۆر، لە پە رەپێدانی کەرتی گەشتیارییەوە هەتا پرۆژەکانی گواستنەوەی ئاو و دواجاریش بیانووە ئەمنییەکان، لە بەردەم کاولکارییەکی بێوێنەدایە و ساڵانە سەدان هێکتار لە دارستان و لەوەڕگەکانی زاگرۆس خاپوور دەکرێت و ڕووبارەکان کەمئاو و وشک دەبن. دەریاچەی ورمێ نموونەی هەرەئاشکرای ئەم دۆخەیە کە نەک تەنها بە هۆی سیاسەتەکانی حکومەتەوە وشک کرا، بەڵکوو لە ئێستەدا بووەتە مەترسییەک بۆ سەر تەندروستی و ژیانی خەڵکی ناوچەکانی دەوروبەریشی. هاوکاتیش چالاکان و ڕێکخراوە ژینگەپارێزەکان لە ڕیزی ئامانجە لەپێشینەکانی سەرکوتکارییەکانی کۆماری ئیسلامیدان  و سەرەڕای هەموو فیداکاری و گیانبازییەکانیان، بە سەدان کەسیان توندی دەستبەسەرگە و زیندانەکان کراون یاخود لە کارەکانیان دوور خراونەتەوە. بێگومان پەرەسەندنی هەژاری و داگیرکردن و بەکارهێنانی سروشتی کوردستان لە لایەن مافیاکانی سەر بە دەسەڵاتەوە لە هۆکارەکانی تری ئەم کاولکارییە لەقەرەبوونەهاتووەن. ژینگە ئێستە بووەتە بەشێک لەو ڕانت و گەندەڵیانەی حکومەت پێشکەشی توێژە وەفادارەکانی خۆیی دەکات تاکوو بەرانبەر بە پاراستنی دەسەڵاتەکەی ئەمەگدار بمێننەوە.

 

کۆی ئەو قەیرانانە وای کردووە کۆمەڵگا بکەوێتە لێواری لێکهەڵپژان و داڕووخانەوە، بە جۆرێک کە بەراورد بە ساڵانی پێشووتر، ڕێژەی تاوان بە شێوەیەکی بەرچاو بەرز بووەتەوە و سەرمایەی کۆمەڵایەتی ڕووی لە کزبوونی زیاتر کردووە. هەروەها ڕێژەی کۆچبەری،  بەتایبەت لە ناو لاواندا،  هێندە پەرەی سەندووە کە لە هەموو  سنوورەکانی  قاچاخی مرۆڤدا  بە سەدان کوردی ڕۆژهەڵات گیانیان دەخەنە بەر مەترسییەوە و لە ڕووداوەکانی نوقمبوونی یەختەی کۆچبەران لەم ساڵانەی دواییدا ژمارەیەکیان گیانیان لە دەست داوە. بەپێی لێکۆڵینەوەیەکی نافەرمی، لە هەندێ گوندی کوردستاندا لە سەدا هەشتای کوڕانی لاو ڕێگای کۆچبەرییان گرتووەتە بەر و ڕەنگە لە داهاتوویەکی نزیکدا هەندێک گوند بەتەواوی چۆڵ بکرێن.

 

ئالێرەوەیە کە هەرجۆرە گردبوونەوە و دانیشتن و وتووێژێک دەبێ ئاڕاستەی نەخشەکێشکردنی ڕێگایەکی کرداری بۆ پرس و کێشە و جووڵانەوە فرەڕەهەندەکانی کۆمەڵگا و بزاڤی سیاسیی کوردستان وەربگرێت و تیۆر و بۆچوونەکان بگۆڕێت بۆ نەخشەڕێگایەکی تۆکمە و گونجاو لەگەڵ واقیع و زەروورەتەکانی سەردەمدا  .بەڵام  زۆربەی هەرەزۆری ئەو دانیشتن و کۆنفرانسانەی لە دەرەوەی کوردستان دەبەسترێت، تەنها لە ڕووبەرێکی ئەبستراکت و تیۆریکدا دەمێننەوە و زۆرکەم ئاوڕ لە واقیعی ژینگە و ژیانی ڕاستەقینەی خەڵکی کوردستان دەدەنەوە.

 

بەم ڕوونکردنەوانەوە دەبێ بڵێین کە ئێمە لە ناو قەیرانێکی قووڵ لە هەردوو ئاستی مەعریفی و کردەی سیاسیدا دەژین، ئەم دیاردەیە سەرجەم هێزە سیاسییەکان و ڕووناکبیر و چالاکان دەگرێتەوە. بەو واتایە کە زۆ ربەمان کەوتو وینەتە ناو جەغزی چەند پارادۆکسێکەوە: کوردبوون، ئێرانیبوون یان حیزبیبوون. ئەم چەندفاقییە هێندەقووڵ بووەتەوە کە گۆڕدراوە بۆ پارادۆکسی نێوان کۆمەڵگەی مەدەنی و ئینتلێجنسیای کوردی. نە حیزبەکان و نە ئینتلێجنسیا ناتوانن چارەسەرێک بۆ پرسی بایۆپۆلەتیک بخەنە بەردەست،  واتە ناتوانن لەو زنجیرەکێشانە بکۆڵنەوە کە ڕۆژانە خەڵکی کورد لە ژیانی تاکی و کۆیی خۆیاندا وەکوو مرۆڤێک ئەزموونیان دەکەن و گیرۆدەیانن. ئەوان نەیانتوانیوە بەدی ل یان دەسپێشخەرییەک بۆ ئەو پرس و کێشانە بدۆزنەوە و زۆرجار کێشەکان دادەبەزێننە سەر هەندێ لایەنی زەینی و ئابستراکت کە دژوازییەکی قووڵی لەگەڵ واقیعی بابەتییانەدا هەیە .

بۆ وێنە ئایدیایەکی وەک دەوڵەتی کوردی وێنا دەکەن و دابەزین لەو داخوازییەیش وەک خیانەت پێناسە دەکەن، کەچی هیچ بیچمبەندییەک بۆ هێزی بەدیهێنەر و ئەگەرەکانی بەواقیعبوونی ئەو  ئایدیایە  لە پراتیکی سیاسیدا دەستنیشان ناکەن  .ئەم چەقبەستوویی و سووڕانەوە بەردەوامە لە خۆیدا هەڵگری ئەو پرسیارە گرنگەیە کە ئەوەی دەستەبژێر، لە واتا گشتییەکەیدا ،ئەیەوێ و داوای دەکات ،تا چەند لەگەڵ خواست و داخوازیی خەڵکدا تەبا و هاوسەنگە؟

 

ئەم قەیران  و در زە هەم لە نێوان  خودی کورددا هەیە و هەمیش لە نێوان کورد و ئێرانییەکاندا. ئەم ەیش  وای کردووە کە هێڵەکانی نێوان خیانەت و خەبات و جاش و نیشتمانپەروەر و هەرهەموو ئەو ناو و چەمکە دوالیستیکانە تێکەڵ بکرێن و لە پراکتیسی سیاسی و بەتایبەت لە ماس میدیادا خاڵێکی قەیرانی گەورە لە دیسکۆرسی سیاسیی کورددا  بێتە ئاراوە. ئەم پارادۆکسانە بەتایبەتی دوای شۆڕشی ژن ، ژیان، ئازادی  زیات ریش  بەرجەستە بوویەوە؛ ڕاستە کە  کورد توانیی لە ماوەیەکی کورتدا ببێتە ئەکتەرێکی سیاسی لە گۆڕەپانی گشتیی ئێراندا، بەڵام هە ر ئەم  پارادۆکس و قەیرانە کە  ماوەیەکی دوورودرێژە لە ناو نەریتی سیاسیی کورددا ڕەگی داکوتاوە، بوو بە یەکێک لە هۆکارەکانی دۆڕاندنی دۆخەکە، بە جۆرێک کە قەیرانەکە دیسان خۆی بەرهەم هێنایەوە و نەمانتوانی لە وە زیاتر درێژە بە یارییەکە بدەین. هاوکات لایەنی بەرانبە ریش، واتە ناسیۆنالیزمی ئێرانی، هەوڵی دا لە لایەکەوە ئەو دەرفەتە سیاسییەی کورد خولقاندبووی بە ئاڕاستەی لەناوبردنی کۆماری ئیسلامیدا بقۆزێتەوە و لە لایەکی تریشەوە پرسی کورد و نەتەوەکانی تری پێ پەراوێز بخات، واتە مۆڵەت بە بوونی سەربەخۆی ئەو بزاڤ و کۆمەڵگەیە نەدات و دیسان بیکاتەوە بە پاشکۆیەکی کۆمەڵگە و ناسیۆنالیزمی ئێرانی.

 

لەسەر ئەم بنەمایە، دەکرێ گۆڕەپانی سیاسیی ئێران و کوردستان بەم شێوەیە وێنا بکەین:

لە لایەکەوە کورد تووشی قەیرانی ناسینی پێگە و جێگەی خۆی وەکوو کەمەنەتەوە یان ئەتنیکێک لە ناو ئێراندا بووە و لە لایەکی تریشەوە پەرچەکرداری بەربڵاوی مەعریفی و دیسکۆرسیڤی نەتەوەدەوڵەتی ئێرانی لە بەردەم خۆیدا دەبینێت. ئالێرەدایە کە ڕۆڵی توێژی سیاسی یان ئینتلێجنسیای کوردی  لە دەستنیشانکردنی  خێ ری  گشتی و ڕێگریکردن لە دروستبوونی یۆگۆسلاڤیایەکی نوێ لە ڕۆژهەڵاتی کوردستاندا  گرنگییەکی کەموێنە وەردەگرێت.  چونکوو  ژیۆپۆلەتیکی ڕۆژهەڵات، بەتایبەت لە ماکۆوە تا  خوار موکریان،  جوگرافیایەکی زۆرزۆر هەستیار و مەترسیدارە و دەشێت  بە هۆی بەریەککەوتنە چاوەڕوانکراوەکانەوە ببێتە مەیدانی کوشتار و کۆمەڵکوژییەکی گەورە بۆ کورد . هەر بۆیە هیچ بەرنامە و تەنانەت ئایدیایەکی سیاسییش بەبێ ئاوڕدانەوە لەم حەقیقەتە مەترسیدارە ڕوونانە ناتوانێت ببێتە بەردی بناغەی نەخشەڕێگایەکی هاوسەنگ و تەبا لەگەڵ هاوکێشەکان و هەروەها لەگەڵ خواست و زەروورەتەکانی ژیانی ڕۆژانەی خەڵکدا .

 

لەبەر ڕۆشنایی ئەم ڕاستیانە و هەروەها بەپێی ئەو شیکاری و ئاخافتن و بۆچوونانەی لە پانێلەکاندا خرانە بەر باس، ئەنجامنامەی ئەم کۆنفرانسە بانگەواز بۆ ئەم خاڵانە دەکات:

 

1. کۆمەڵگەی مەدەنی پنتی سەرەکیی جووڵانەوەکانی ڕۆژهەڵاتی کوردستان لانیکەم لە سێ دەیەی ڕابردوودا بووە ،ڕاپەڕینی ژن، ژیان، ئازادی پێی سەلماندین کە جەماوەری کوردستان ئامادەی تێکۆشان و بگرە فیداکاریی زۆر گەورەن، بەڵام هاوکاتیش چونکوو ڕێکخستنێکی تۆکمە بوونی نییە، ئەنجامەکان قەت لە ئاست هەوڵەکاندا نین.

پێویستە هەموو لایەنەکان، بەتایبەت حیزبە سیاسییەکان، وێڕای ڕێزگرتن لە بوونی سەربەخۆی کۆمەڵگەی مەدەنی و دوور لە هەوڵدان بۆ پاوانکردن و بەحیزبیکردنی دامەزراوە مەدەنی و کۆمەڵایەتییەکان، کار بۆ بەڕێکخستنکردنی هەرچی زیاتری خەڵکی کوردستان بکەن؛

2. بە گەڕانەوە بۆ هەرهەموو ئەزموونە  مێژووییەکان، یەکڕیزی و یەکگرتوویی خاڵی هەرسەرەکییە بۆ هەرجۆرە تێکۆشان و یارییەک لە گۆڕەپانی سیا سی و یاسایی )حقووقی(دا. هەموو حیزب و دەستەبژێر و لایەنەکان بە شێوەی زارەکی ددان بەم زەروورەتەدا دەنێن، بەڵام بە کردەوە کەمترین هەنگاوی بۆ هەڵدەگیرێت و بگرە دژایەتیی ئاشکرا و شاراوەیشی لەگەڵ دەکرێت. لێرەوە داوا لە هەموو هێز و لایەنە کاریگەرەکانی کوردستان دەکەین بەدەم داخوازیی ڕەوای خەڵکەوە بێن و کۆتایی بە چەندبەرەکی و لێکترازان بهێنن و  بۆ یەکڕیزی و یەکگرتوویی  لە فۆرمێکی ڕێکخراوەییدا هەنگاوی کرداری بنێن.

3. داوا لە هێزەکانی کوردستان دەکەین پاش پێکهێنانی بەرە یان پلاتفۆرمێکی ناوخۆیی ،هەوڵەکانیان بۆ دروستکردنی فۆرمێکی هاوشێوە بۆ  هێزە  ئۆپۆزیسیۆنەکانی دیکەی ئێران، لە پێکهاتە و گرووپە نەتەوەییەکانەوە هەتا لایەنە سەرانسەرییەکان، بخەنە گەڕ. ئەمەیش بە دیاریکردنی کۆمەڵەپێوەرێکی وەک دیمۆکراتبوون و ئازادیخوازبوون و دووربوون لە هەرچەشنە پاوانخوازییەکی فاشیستی یان ئیستیبدادی.

4. لە درێژەی ئەم هەوڵەی ئێستا و ئەم کۆنفرانسەدا، هەوڵ دەدرێت  لە داهاتوودا کۆنفرانسێکی نەتەوەیی دیکە بۆ سەرجەم حیزبە سیاسییەکانی ڕۆژهەڵات گرێ بدرێت، ئەمەیش بە مەبەستی یەکگرتوویی  و خۆتەیارکردن بۆ ڕووبەڕووبوونەوەی هەموو ئەو گۆڕانکاریانەی پێ دەچێ لە داهاتووی نزیکدا لە ڕۆژهەڵاتی کوردستان و ئێران بێنە ئاراوە. هەروەها بەو مەبەستە کە کوردستان خۆی ڕووداوخولقێن بێت نەک ئەوەی هەمیشە پەرچەکردارێک بێت لە بەرانبەر ڕووداوەکاندا. هەر بۆیە داوا لە هەموو حیزب و لایەنەکان دەکەین بە دەم بانگەوازی کۆنفرانسی داهاتووەوە بێن و بەرپرسیارێتیی مێژوویی خۆیان لەم دۆخە هەستیارەدا بە کردەوە جێبەجێ بکەن .

5. داوا دەکەین پێشوازی و پەلە بکرێت لە گرێدانی کۆنفرانسێکدا بۆ سەرجەم حیزب و هێزەکانی هەرهەموو بەشەکانی کوردستان بە مەبەستی داڕشتنی جومگە بنچینەییەکانی سیاسەتێکی ستراتیژیک و گشتگیر بۆ ئاسایشی  نیشتمانی و بەرژەوەندییە باڵاکانی کوردستان.

6. کار بکرێت بۆ دروستکردنی ناوەند یان ژوو رێکی توێژینەوە و ڕاوێژکاریی زانستی و ئەکادیمیک کە پێک هاتبێت لە خاوەنڕایانی لێهاتووی ناوخۆ و دەرەوە لە بوارە جیاوازەکاندا، ئەمەیش بە مەبەستی توێژینەوەی بەردەوام بۆ زەروورەت و ئەگەرەکانی بەردەم جووڵانەوەی سیاسی-کۆمەڵایەتیی کوردستان لە ئێستە و داهاتوودا.

7. بە لەبەرچاوگرتنی ڕاپەڕینی ژن، ژیان، ئازادی و توانا کەموێنەکانی ئەو دروشم و ئایدیایە، پێویستە لە پرۆسەی بڕیاردان و لە هەموو ڕێکخراوەکانی بەستێنی سیاسەت و کۆمەڵگای مەدەنیدا، ژنان خاوەنی پێگە و ڕۆڵی کەسێتی و یاسایی خۆیان بن. هەر بۆیە داوا لە هەموو حیزب  و ڕێکخراوە سیاسییەکان دەکەین هەنگاوی جیدی و کرداری بۆ ئەم مەبەستە بگرنە بەر .

 

 

 

٢٧ی ئاڤریلی ٢٠٢٥، هۆڵەندا