پەیامی هاوخەمی و شکۆ
بۆ بنەماڵەی سەربەرزی شەهیدانی ڕێگای پاراستنی خاک و ژینگەی نیشتما
شەهید ئاری موختار و شەهید محەمەد شێخ حەیدەر
قارەمانانی هەڵەبجەی هەمیشە زیندوو!
بە دڵێکی پڕ لە خەم و لەهەمان کاتدا پڕ لە شانازییەوە، هەواڵی شەهیدبوونی دوو ڕۆڵەی قارەمانی گەلەکەمان، شەهید ئاری موختار و شەهید محەمەد شێخ حەیدەرمان پێگەیشت. ئەم دوو لاوە نیشتمانپەروەرە، لە کاتێکدا گیانی پاکیان بەخشی کە بە گیانفیداییەوە لە سەنگەری پاراستنی دارستان و شاخەکانی پیرۆزی هەڵەبجەدا، بەرەنگاری ئاگری ڕق و نەزانی دەبوونەوە. ئەوان بە خوێنی گەشی خۆیان، وانەی فیداکاری و ئەرکی نەتەوەییان بۆ پاراستنی جوانی و ژینگەی کوردستان و سروشتی هەموو جیهان، جارێکی دیکە بۆ هەموومان نووسییەوە.
شەهیدبوونی ئەم دوو قارەمانە، خەسارەتێکی گەورەیە، بەڵام لە هەمان کاتدا، بەڵگەی زیندووی ئەو ڕاستییەیە کە گەلی ئێمە، پاراستنی سروشتی نیشتمانەکەی، وەک پاراستنی کەرامەت و شکۆی خۆی دەزانێت. شاخ و داخ و دارستانەکانی کوردستان، تەنها جوگرافیایەک نین، بەڵکو بەشێکن لە ناسنامە و مێژووی خوێناوی و شکۆمەندی ئێمە. هەر درەختێکی ئەم خاکە، یادگارییەکە و هەر چەم و کانییەکیشی، سیمبولی ژیان و بەردەوامیی نیشتیمانەکەمانە.
لەم بۆنە خەمناکەدا، وەک کۆمیسیۆنی ژینگەی کۆنگرەی نەتەوەیی کوردستان، پرسە و سەرەخۆشیی خۆمان، ئاراستەی بنەماڵەی سەربەرزی شەهیدان و تەواوی خەڵکی خۆڕاگری هەڵەبجە و گشت گەلی کوردستان دەکەین. داواکارین لە هەموو تاکێکی ئەم نیشتمانە، بەتایبەت گەنجان، ڕێبازی ئەم شەهیدانە بکەنە چرای ڕێگایان و بە هەستی بەرزی نەتەوەیی و ژینگەییەوە، پارێزەری خاک و ئاو و سروشتی کوردستان بن. با گیانی پاکی شەهیدانی ژینگە، ببێتە هاندەرێک بۆ یەکڕیزی و کاری هاوبەش، لەپێناو پاراستنی ئەم میراتە پیرۆزە بۆ نەوەکانی داهاتوومان.
ڕوحیان شاد و ڕێگایان پڕ ڕێبوار بێت.
کۆمیسیۆنی ژینگە – کۆنگرەی نەتەوەیی کوردستان
٢٠٢٥/٨/٢٠
