سبەی جەژنە، جەژنی ڕەمەزانە. جەژنی ڕەمەزان سەرەتا لە زیندانیان و ئازادیخوازان، لە خەڵکی کوردستان و هەموو جیهانی ئیسلامی پیرۆز دەکەین. هیوادارین جەژنی ڕەمەزان ببێتە مایەی ئاشتی و ئارامی لە وڵاتەکەمان و لە سەرتاسەری جیهاندا.
ئێستا لە سەرەتای بەهارداین. ئێمە لە هەفتەی نەورۆزداین، بە جۆش و خرۆشێکی زۆرەوە جەژنی نەورۆزمان لە سەرتاسەری کوردستان و دەرەوەی وڵات بەڕێوەبرد. بە تایبەتی نەورۆز لە ڕۆژهەڵات و باکور وەک یاخیبوونێک بەڕێوە دەچوو. بە جۆش و خرۆشی نەورۆزەوە پێشوازی لە جەژنی ڕەمەزان دەکەین.
لە باکوری کوردستان ماوەیەکە دیالۆگ لە نێوان دەوڵەتی تورکیا و تەڤگەری ئازادیدا هەیە. بەڵام تا ئێستا جگە لە لێدوانەکان هیچ هەنگاوێک نەنراوە. هەروەها لە ڕۆژئاوای کوردستان پرۆتۆکۆلێک لە نێوان سەرکردایەتی خۆسەر و ئیدارەی دیمەشق واژۆ کرا. هیوادارین ئەو دیالۆگە کە لە باکوور و ڕۆژئاوا دەستی پێکردووە بگاتە ئەنجامێکی ئەرێنی و کێشەکانی هەردوو بەشەکە بە شێوەیەکی ئاشتیانە چارەسەر بکرێن.
هێشتا دۆخێکی ئاڵۆز لە وڵاتی ئێمەدا هەیە. لە سەرانسەری کوردستان داگیرکاری و هەڕەشە و تۆقاندنی گەلەکەمان لەلایەن دوژمنانەوە بەردەوامە. لە ڕۆژهەڵاتدا فشاری دەوڵەت بۆ سەر خەڵک بەردەوامە و کێشە کۆمەڵایەتییەکان ڕۆژ لە دوای ڕۆژ قووڵتر دەبنەوە. کێشە ئابووری و کۆمەڵایەتییەکان لە باشوور بەردەوامن، کێشەکانی ناوچە داگیرکراوەکان هێشتا چارەسەر نەکراون و هێرشەکانی دەوڵەتی تورک زیاتر بوون. پێویستە هەموو هێزەکانی کوردستان لە دژی ئەو هەڕەشە و هێرشانە بوەستن.
ئێمە بەبۆنەی جەژنەوە جارێکی تر داوا لە هەموو کورد و کوردستانیان دەکەین کە دژی هێرش و داگیرکاری بوەستنەوە و دەنگی ناڕەزایی خۆیان بەرامبەر داگیرکەران بەرز بکەنەوە و یەکڕیزییان پتەوتر بکەن.
تەنانەت لەم هەلومەرجەشدا هیوادارین و باوەڕمان وایە کە گەلەکەمان بەم زووانە لە خاکە ئازادەکەیدا بە ئارامی و ئازادی جەژن و ئاهەنگەکانی خۆی بگێڕێت. بەم بۆنەیەوە جارێکی تر پیرۆزبایی جەژنی ڕەمەزان لە هەموو زیندانیان و ئازادیخوازان و لە خەڵکی کوردستان و لە هەموو جیهانی ئیسلامی دەکەین.
کۆنسەی بەڕێوەبەریی کۆنگرەی نەتەوەیی کوردستان
2025.03.29 برۆکسل
