لە مێژووی کوردستاندا، هەمیشە نەورۆز  پێگەیەکی تایبەتی هەیە. نەورۆز رۆژی رزگاری، رۆژی بەرخۆدان، راپەڕین و سەرکەوتنە بەسەر ستەمدا. نەورۆز جەژنی ئازادی یە و لەسەر بنەمای خەبات و تێکۆشان دژی ستەم و زۆرداری سەریهەڵدا و بوو بە هێمای رزگاری و ئازادی لەبەرامبەر زوڵم و ستەمکاری، کوێلایەتی، داگیرکاری و هەموو جۆرە چەوسانەوەیەکدا.

گەلی کورد ساڵەهای ساڵ بە رەنج  و قوربانیدانی گەورەوە نەورۆزیان کردووە بە رۆژی خۆشی و شادی گەلەری و رۆژی بەرخۆدان. لە ئەنجامی ئەو هەموو خەباتەی کورد لە پێناو ئازادی و رزگاریدا  لە ئاستی نێونەتەوەییشدا  نەورۆز بە جەژنێکی کوردی ناساندووە. گەلی کورد لە سەرتاسەری کوردستان و لە دەرەوەی نشتیمانیش جەژنی نەورۆز بە ناوەڕۆکە مێژووییەکەی خۆی، بە ئامانجی رزگاری و ئازادی پیرۆز دەکەن. کوردان لە تێکۆشانی هەمەلایەنیاندا لە گوند، شار، ناو زیندانەکان لە هەموو شوێن کایەکانی ژیاندا نەورۆزیان کردۆتە  سەنگەری خەباتی رزگاری و ئازادی.

لە سەرتاسەری کوردستان ئەمڕۆ ئاگری نەورۆز گەشاوەترە. لە باشور و رۆژاوای کوردستان بە فەرمی پیرۆز دەکرێت. لە رۆژهەڵات  و باکوری کوردستانیش سەرەڕای هەموو ئاستەنگ و رێگرییەکی داگیرکەران دیسانەوە بە مانا راستەقینەیی نەورۆزەوە خەڵکی ئاهەنگ دەگێڕن و ئاگری بەرخۆدان و رزگاری و ئازادی هێندەی تر بە گوڕوتینتر دەکەنەوە. 

لەگەڵ رۆژی نەورۆزی ئەمساڵدا دەست بە ساڵێکی نوێ دەکەین. ساڵی رابردوو لە هەموو بوارەکانەوە ساڵێکی پڕ لە تێکۆشان بوو. لە ساڵی رابردوودا دوژمنانمان زۆر چالاک و ئاکتیڤانە بە هێزی زۆرەوە هێرشیان کردە سەر زۆر ناوچەکانی کوردستان. بەتایبەتی دەوڵەتی تورکیا هێرشەکانیان بۆ سەر باشور و رۆژاوای کوردستان زیاد کرد. بەم هێرشانەیان سەلماندیان کە ئەم دەوڵەتە دوژمنی سەرسەختی کورد و کوردستانە. پلانەکانیان پلانی لەناوبردنە، ئەگەر لەدەستیان بێ لە هەر شوێنێکی دونیا بێت دەستکەوتەکانی کورد لەناو دەبەن. لە بەرامبەر ئەو هێرشانەدا، تەڤگەری ئازادیی لە سەرتاسەری کوردستان بەرگری – بەرخۆدانێکی گەورە ئەنجامدرا.

دەوڵەتی ئێرانیش لەم بارەوە هاوبەشی دەوڵەتی تورکیا یە. ئێران لە ماوەی ئەم ساڵەدا بە یارمەتی دەسەڵادارانی بەغدا هێرش و فشارێکی زۆریان  لەسەر هێزە کوردیەکان دروستکرد.

لە ئێستاوە روون و ئاشکرایە کە ئەمساڵیش دەبێتە ساڵێکی خەبات و تێکۆشان. دوژمنانمان لە چەندین ئاراستەوە هێرش دەکەن. بەتایبەتی دەوڵەتی تورکیا بۆ تێکبردنی دەستکەوتەکانی کوردە لە باکور و باشور و رۆژاوای کوردستان ئامادەکاری بۆ هێرشی گەورە دەکات.   لەلایەکی دیکەوە، لە سەرەتای مانگی ئۆکتۆبەرەوە گەڕان بە دوای ئاشتی و دیالۆگدالە ئارادایە. دەوڵەتی تورکیا لە شەڕی 40 ساڵەیدا سەرنەکەوت، بارودۆخی ناوچەی رۆژهەڵاتی ناوەڕاستیشی بەسەردا هات و  ناچاریان کردن بەدوای لێگەڕانی جیاواز بکەن. ئەم دیالۆگە کە بە پێشەنگی بەڕێز عەبدوڵا ئۆجالان لەگەڵ تەڤگەریی ئازادیدا بەڕێوەدەچێت، ئێستا لە قۆناغی سەرەتا دایە و روون نیە کە دەرەنجامەکەی چۆن دەکەوێتەوە. ئامانجی تەڤگەری ئازادی ئەوەیە کە بەڕێگای دیالۆگەوە پرسی کورد چارەسەربکرێ. بەڵام پەیام و هەڵسوکەوتی دەوڵەتی تورکیا لەگەڵ پرۆسەیبئاشتیدا ناگونجێت. ئێمە وەک کورد دەبێت بۆ هەر پێشهات و ئەگەرێک ئامادەبین.

دەوڵەتی ئێران لەلای خۆیەوە بە هەموو شێوەیەک گەل و چالاکوانانی کورد دەکاتە ئامانج و دەیەوێت هێزە ئازادیخوازەکان لەناو ببات. هەرچەندە لە باشوری کوردستان قەوارەیەکی فەرمی هەشبێت ، بەڵام پرس و کێشەکان بەردەوامن و دۆخی ناوچە داگیرکراوەکان خراپ و ناڕوونە. دوژمنان بۆ لاوازکردن و لەناوبردنی قەوارەکە لە جووڵەدان و کاری بۆ دەکەن.  

لە رۆژاوای کوردستان، لەشکرکێشی، داگیرکاری و هێرشەکانی دەوڵەتی تورکیا بەردەوام و لە زیادبووندایە. ئەو دەوڵەتە بە ئاشکرا پەیامی ئەوەیە و هەڕەشەی لەناوبردنی دەسکەوتەکانی گەلەکەمان لە رۆژاوا دەکات. لە کۆتایی ساڵی رابردوودا رژێمی بەعس رووخا و لەناوچوو، هێزێکی توندڕەوی ئیسلامی (هەیئەی تەحریری شام) هاتە سەر دەسەڵات. دۆخی سوریا بە گشتیی نا روونە نازانرە لە داهاتوودا چی روودەدات. 10  ئازاری 2025 رێککەوتنێک لە نێوان بەڕێوەبەریی خۆسەر و دەسەڵاتدارانی شام کرا. ئەم رێککەوتنە گرنگی خۆی هەیە، یەکەم جارە لە سوریادا  لەسەر ئاستی سەرۆکایەتییدا بە بەڵگەی فەرمی دەوڵەت لە سەر بنەماکانی دەستور و بوون مافی گەلی کورد قبوڵ بکرێت. بۆیە پێویستە هەموو هەوڵێک بدرێت ئەم پەیمانە جێبەجێ بکرێت.

زیاتر لە ساڵ و نیوێکە شەڕێکی گەورە لە رۆژهەڵاتی ناوەڕاستدا روودەدات. شەڕەکە لە غەززەوە دەستی پێکرد لەوێوە تەشەنەی کرد و پەڕیەوە بۆ بەیروت و  سوریا و یەمەن  و عێراق  ئێران. وا مەزەندە دەکرێت کە ئەم شەڕە گەورەتر دەبێت و کوردستانیش دەگرێتەوە. دەوڵەتانی داگیرکەری کوردستان هەموویان دەبنە لایەنێکی ئەم شەڕە. ئەم دۆخە هەم مەترسیی، هەم دەرفەت بۆ کورد دەهێنێت.

ئەم دۆخە ئەرک و بەرپرسیاریی ئێمەمانان دیاری دەکات، پێویستە ڕێ و شوێن و تەدبیر بەرامبەر هەموو پلان و ویستەکانی دوژمن و داگیرکەران بگرینە بەر، هێزی بەرگریی بەهێزبکرێت، هێرشەکانی داگیرکەران بەرپەرچ بدرێتەوە، دەستکەوتەکان بپارێزرێن و دەستکەوتی نوێ بەدەستبهێنرێن. 

دەبێ لە باکور و  رۆژاوا هەوڵەکانی ئاشتی و دیالۆگ پشتگیریی بکرێت. هاوکاری و دەستتێکەڵکردن لەگەڵ دوژمنان وەک هێڵی سوور ببینرێت و مەحکومکردن. لەپێناو ئەمانەدا، لە سەرەتادا یەکڕیزیی ناو ماڵی کورددا دابمەزرێ و یەکێتیی نەتەوەیی و نشتیمانیی پتەوبکرێ. دەبێ ئەم ساڵ ببێتە ساڵی ئازادی.

ئێمە لەم دۆخەدا پێشوازی لە نەورۆزی ئەمساڵ دەکەین. جەژنی نەورۆز وەک مانا و واتای خۆی بە گیانی بەرخۆدان و رزگاری و اازادی کوردستان پیرۆز دەکەین. بانگەوازی گەلەکەمان دەکەین: وەک هەموو ساڵێک بە گیانی ئاهەنگگێڕانەوە بێنە سەر شەقامەکان و  پێشوازی لە نەورۆزی کوردان بکەن.

لەم قۆناغە گرنگەی پرۆسەی تێکۆشان بۆ رزگاری و ئازادی کوردستان، دەبێ ئاگری نەورۆز ببێتە چرا و مەشخەڵێکی گەشاوەی یەکڕیزیی و تەبایی گەل و نەتەوەی کوردستان.

کۆنگرەی نەتەوەیی کوردستان – ک ن ک، بەم بیر و باوەڕیەوە نەورۆزی هەموو کورد و کوردستانیان بە جۆش و خرۆشی یەکێتیی نەتەوەیی و نشتیمانیی  پیرۆز دەکات.

کات کاتی بەهێزکردن و پتەوکردنی برخۆدانە

کات کاتی سەرکەوتن و ئازادی یە

نەورۆزتان پیرۆز بێت!

 

کۆنسەی بەڕێوەبەریی کۆنگرەی نەتەوەیی کوردستان – ک ن ک

 

20 ی ئازاری2025  – برۆکسڵ

 

.